حبل السما السُرِّي
أحمد الشيخ | شاعر وناقد مصري
للشتا..مساحتي الواسعة للحواديت
لمحوشين اللقمة بالهَم البايت
===
لأسامينا اللي بترمم جدار البيت
لقمر ملازِم خطوة الفايت
===
للشتا الحالب بزاز السما.. تُرُخ نجوم
لشمس مدارية غمازات بغيوم
===
يارصيف ياترزي جروح المخذولين
ياضربات قلبها (المقسوم)
===
ياريش جناحها لحاف البردانين
ليه كل ما يهِل الشتا يلاقينا مدمعين
===
جايز عشان لسه ريحتِك ف الكوفية
يمكن حَنِين ضِلعي لضوافرك الكاشمير
===
أو طعم الأزمة اللي مكفيكوا فيا
حنين عيني تمشيكي بالمشاوير
===
حفيف النخل القاطع حبل السما السُرِّي
أنوار شبابيك البيوت بالليل
===
كل الحاجات بتعُض روح سِرِّي
كل الحاجات تنهش قليل الحيل
