سعيد شحاتة | القاهرة
هو إيه بيتم في الكوخ اللي جنبي
ليه خدوني بذنبه واتاخد بذنبي
لابس المذكور هناك لبسه الكرنبي
والغيطان مبدوره بطيور الضواحي
الهوا طالع مزمزق م النواحي
والخريف مفرود وصاحي مع الأضاحي
حد كان بيناحي بس الصوت تلاشى
الوشوش إياها لازقه ف كل شاشه
اتبسط واشرب بوغاشه وغني صلصه
اللي نفسه يعيش غدًا هيعوز مخالصه
واللي نفسه يموت يجيب اتنين شهود
الجميله إياها ماشيه بدون خدود
والخزاين صاحيه بتحاول تصلّي
صوت بتاع الفته في الجامع وَصلّي
خلي بالك وأنت بتعدي السحايب
خطي بشويش زي ما تكون
…………………. حد خايب أو ضعيف
الشيطان في الزحمه كان عامل شريف
والغريب عامل رغيف
السكات في المترو كِيف
والكلام في الفاضي حكمة شيخ مولّي
صاحبي وقت الشده شد الليل وقال لي
بس أنا ما سمعتش الضلمه ف عنيه
هو في الكوخ اللي جنبي بيحصل ايه
حد داري بحاجه فعلاً
حد شايف حد أو سامع صريخه
كل واحد حامي سيخه
…….. وغازره في العضم المريض
كل خد رقيق مُعرّض يهزمه الكف العريض
كل فرخه حزينه بتحاول تبيض
كل عين موجوعه بتجرّب تفيض
كل سنارة أمل بتصيد رهاين
جتة العاشق على راية المداين
ضحكة المعشوق جناين
فرحة الخاين بريحة الليل تخوّف
بكره جاي لكن مازال داير يسوّف
طاف ركاب الموعودين ساكت وطوّف
والغنا زهزه في أحلام الحزانى
قصر إيه اللي اتبنى جنب الخزانه؟
عدل مين المحمي بكفوف الميزانه؟
الورود ع السكه راسمه الصمت خانه
والسكك مفتوحه للقطر المعاكس
كنت جنب الكوخ باشاكس واستخبى
أو بأعبي الريح في قرطاس المربى
أو بأقف ساكت وأشاور للجميع
صيف حبيبتي الطاهره أطرى من الربيع
ضحكتي للنور كما ضحكك المطيع
المذيع بيقول هناخد ريع تعبنا
بس بعد ما قالها سابنا وفات حزين
صوت إمام في الراديو بيصحي الحنين:
(هما مين -في العركه-
…….. وإحنا -إزاي- ومين)
الشيطان في الزحمه كان عامل كمين
…………………………… لملاك مسالم
هو إيه بيتمّ فوق درج السلالم؟
…………………… شيء مريب
كل ما اسأل نفسي
…….. نفسي تقول: يا عالِم
……. عيشها زي النور غريب
