الشاعرة سهير سليم | القاهرة
باشد القوة من جدري
الورق دبلان
حروفي اتكسرت من وقفة الغربان
قعدت سنين على البحر الطويل أصطاد
وهاكتب ايه؟
لايمني بس ع المطلع
هاخلي الضحكة تلبس من الوجع سترة
وادوَّر ساقية الفقراء
تلف ف مية الارزاق نبطل صوم
ماكل ماهجِّن البركة بتولد بوم
………..
لايمني بس ع المطلع
وفسرلي المجازر ليه
ف شرع السهرانين رؤية
وليه تفسيرها مايهمش
وليه اولادنا طيارة ورق
ف الهوجة بتضبش
لايمني قلمي والورقه
وهاكتب لك قصيدة تعدِّل المكتوب
تخلي الكفرة يبنوا بيوت
وارجع عقرب الساعه لعدو الدين
وهاقسم له القمر نصين
يجوز يستوعب الرؤية .
قطعنا من التاريخ
صفحة قديمه ولفيناها حجاب
عرفنا ان احنا مش هانعيش
ومش لازم حياتنا يكفنوها حرير
مادام استرخصونا وكفنونا بخيش
سيبوني افضح وافك طلاسم استعبادعلى المكشوف
واطير لك جوزين احلام فتتحول سيوف
وهاكشف مفتي سكران للثمالة
لوى دراعنا فقدمنا استقاله
من السنه وم الفرض اللي سافر
بنات بالليل بتتقطع نساير
……..
هاربي الموت على ايديا
واجيب تربي
هايبدر ف الغيطان العضم
فتطرح جتة تستحمل عذاب القبر
ياريت اقدر اجيب كبشه
من أتر اللي صبروا زمان
وابوس ايد النبي فيجيلنا ف الاحلام
……
لايمني بس ع المطلع
ومن بحر الخليل هسأل :
لماذا البحر موفور لدى الغرب
وبحر العرب مجزوء بلا سبب
وليه بيرم مشي وسايب
وراه المجلس البلدي
…….
انا ف آخر طابور العمر
باضفر شعري واتطهر
لا هاطلب م السما هدنة
ولا هاستنى لبشارة
…….
لايمني بس ع المطلع
وهارجع لك شباب دايم
مدام طوب الامل نايم
هاشدة واعلى سقاله
واربي عيالي من تاني
واقول خلفت رجاله
اصيلة ومش بشر عيرة
ومش زي اللى ماتوا فطيس
ومش سايبين علامة
جروح قامت على السكينة
بتنقط كرامه
……..
لايمني بس ع المطلع …
