وقت الاندهاشات الحميمة

وفاء المصري | شاعرة مصرية

بعد الحزن، الكتابة
بتِصفَى زَي الصلاة
زَي امَّا تُمطُر سحابة
تِغسِل جمال الحياة
///
حزينة انا من امبارح
وقاعدة باكتب قصيدة
قرَّبْت جدا فيها
ولسه .. جدا .. بعيدة
///
واصلني ضيَّك هنا
شئت انتَ والا أبِيت
مين اللي يمنع قمر
يوْصَل لأبعد بيت
///
يوسف جمالك سحَرني
عيَّطت عَ الشبَّاك
من يومها نومي هجرني
وليلاتي باستناك
///
يا غيابك المؤلم
يا وجودك الشارح !
مديت إدين قلبي
وحضنتك امبارح
///
وانا لْعِنيك الجميلهْ
لا أستطيعُ سبيلَا
لو بس بصِّت في عيني
واللهِ هاسقَط قتيلهْ !
///
يا منتهى الرقهْ
يا مبتدا بُكايا
غنايا مالهوش معنى
لو مش واصلْ لَك غنايا
///
ليه فيك حاجات مني
وفيَّا منَّك حاجات
ليه طعم صمتَك باحبُّه
لمَّا يطول بالذات ؟

///

باحس فيه كده حاجة
كما دمعتي المُهتاجة
حاجة زي حيرِة عاشق
حاجة زي وجع النايات
///
يا خمرِة التبليمة
وقت اندهاشته الحميمة
ولا ميت ديوان يوْصِفه
الواد بتاع البنات !