أمي الحبيبة باختصار
محمد حسني إبراهيم | شاعر مصري
امى الحبيبة باختصار
قلبك عليا ليل نهار
عايش بحسك فرحتك
واتمنى اخضر سكتك
اخد امان من دعوتك
يبقى حنان قلبك مدار
باشتاق لحضنك كل يوم
ارجع صبى من غير هموم
علشان عنيكى الطيبين
دايما تسمى الحب دار
وعنيك وسجادة الصلاه
حفظت حدود عمرى اللى تاه
سلمت ليك قلبى وآه
ومهما اكبر
حبك انتى يكون عمار
امى الحبيبة باختصار
انا ليّا روح
بتاخدني واحة ربنا
تفرش لي من دعوتها نور
تفرد سطور عشقي لها وبقلبي ابوح
انا ليّا روح
البصة ف عنيها الحنان
لمسة إيديها الطيبة عز الوجع بيكون آمان
من يوم ماشالت جوة منها دنيتى
وبقيت ونيسها ف تكملة مشوار
شالت دموعنا والجروح
قنديل محبة ف دربنا
انا ليا روح
بتاخدني واحة ربنا
