أوراق الخريف.. شيزوفرينيا (١)

شرين خليل | مصر

جلست أمامى تبكي بشدة، وتشتكى من زوجها والدموع تنهمر من عينيها مثل المطر، ولكني لم أتعاطف معها مطلقاً. شئ غريب! كيف حدث لي ذلك وأنا التى تبكي لو رأت أحداً يبكي؟!. هل هى غير صادقة ؟؟ وهذه دموع التماسيح؟
حاولت إظهار التعاطف معها، وتقديم بعض الحلول لها، لأنها لجأت إلىّ، واختارتنى أنا بالتحديد لتحكي معي.
وبالفعل حاولت أن أخفف عنها.
ذهبت وهى فى حالة من الإرتياح كما زعمت..
أما أنا فكنت في حيرة من أمري..هذه الفتاة أعرفها منذ الصغر فهي تسكن في نفس الحي ودائماً تأتي لتزورنا وعلى حد قولها أنها تشعر معنا بالأمان والحب الذي لاتجده في أسرتها..
تمتلك موهبة تطريز الملابس وبدأت حياتها العملية كعاملة في إحدى مصانع الملابس .
ادخرت المال و قامت بشراء آلة للتطريز وجذبت كل نساء وبنات المنطقة بأسلوبها اللطيف وطريقتها الودودة في التعامل..
وأصبحت مشهورة في المنطقة..
ارتبطت بشاب لم يكن مؤهل للزواج وتم الزواج رغماً عن الجميع..
هذا الزوج لا يفعل شئ كل مايمتلكه محل صغير لصيانة الهواتف المحمولة..
أنجبت ولد وبنت والحياة تسير بشكل جيد..فما الذي يجعلها تكذب؟؟ ومافائدة هذا الكذب؟ وكيف أتأكد أنها كاذبة؟؟فمن الممكن أن تكون صادقة ؟ ..وإحساسي هو الكاذب..
لا أنا دائماً أصدق ما أشعر به ..
جلست مع والدتي وأخبرتها بما حدث تأثرت أمي وقالت:
البنت دي طول عمرها مسكينة أبوها كان بيعاملها معاملة قاسية بسبب إنها بنت وهو كان عاوز ولد وأمها للأسف منعدمة الشخصية عمرها ماكانت حنونه على بنتها ودايماً تتهم بنتها إنها بتكدب وبتألف قصص ماحصلتش وكل يوم أبوها يضربها بسبب كدبة جديدة من خيالها
ولما كبرت واشتغلت اتجوزت شاب مش مناسب عشان تخلص من حياتها في بيت أهلها.
– للدرجة دي اتجوزت عشان ترتاح من أهلها!؟
-أيوا يابنتي اتجوزت غصب عنهم كلهم كانوا رافضين جوزها دا عشان على قده وهما كانو عاوزين واحد غني..
-إزاي أب وأم يعملوا كده مع بنتهم..
-واكتر من كده كمان دول كانوا بيشغلوها عند الجيران تنضف لهم بيوتهم وهي طفلة صغيرة..
-معقولة يا أمي؟! أنا أول مرة أتكلم معاها كتير كده وحسيت أنها فعلاً عندها مشكلة وواضح أنها من زمان وواضح كمان إن أهلها السبب .
-أبوها كان بيعاقبها لأنها بنت وهو كان عاوز ولد ..
-طيب ماهو الولد جه بعدها ومش ولد واحد لا دول اتنين ..
-أبوها بيعامل الولاد معاملة طيبة لكنه قاسي معاها جداً..
-مع إن المفروض يكون العكس لأن دي البنت الوحيدة ..
-هو تفكيره كده إنسان غريب وبصراحة أنا طول عمري مش برتاح له عشان كده علاقتنا بيهم محدودة حتى لما كانت بتيجي تزورنا كنت بمنعك تقعدي معاها لإني عارفاكي عاطفية وبتتأثري بأي حد ..
-أنا بردو استغربت وقولت لنفسي ليه آلاء دي جات تشتكي لي وتفضفض معايا وأنا اصلا مليش علاقة بيها..
-هي طول عمرها نفسها تقرب منك إنتِ وتبقى صاحبتك..
-اشمعنا أنا..
-لأن محدش في الشارع قريب منها وممكن تثق فيه على الرغم من أنها لها معارف كتير بسبب شغلها..
-عموماً يا أمي أنا مش مرتاحه لكلامها ومش مصدقاها..
-ماتشغليش بالك بيها هي جات تفضفض معاكي وخلاص ..
أنهت أمي الحوار معي وطلبت مني ألا أفكر في هذا الموضوع مرة أخرى فهو من وجهة نظرها مجرد فضفضة ..
أما أنا فبعد ماقالته أمي عنها فلقد أدركت تماماً أنها تعاني من حالة نفسية غير طبيعية..
تحدثت مع أختي فهي تدرس علم نفس ..
ردت بكل سخرية:
نورهان ..إنتِ فاكراني دكتورة ولا أخصائية نفسية ..أنا لسه في سنة أولى ومعلوماتي على قدي ..
– يانيفين أنا قصدي إن أكيد عندك في الكتب أي معلومة عن حالتها لإني حاسه إن عندها مشكلة نفسية .
-وليه ماتقوليش إنها بتكدب..
-طيب إيه الحالة اللي ممكن تخلينا نعتقد إن اللي قدامنا بيكدب أو بيمثل أو بيتقمص دور مش دوره..
-شيزوفرنيا..
-شيزوفرنيا ؟؟
-ممكن تكلميني أكتر عن الشيزوفرنيا..
-أنا مش فاضيه عندي إمتحان وبعدين قولت لك أنا لسه في سنة أولى.
-خلاص مش هاعطلك، أنا هادور بنفسي وهاعرف ومش بس كده أنا هاقابل والدها ووالدتها وهاساعدها..
-نور إنتِ شاغله بالك ليه هي كانت من بقية عيلتنا دي واحده جارتنا ومن بعيد كمان ..
-أنا بحب أساعد الناس وطالما هي لجأت لي تبقى محتاجه المساعدة..
-براحتك يانور بس مش أي حد يحكي لك حاجه تصدقيها..
-وهي هاتكدب ليه ؟ مصلحتها ايه ؟
-ممكن تكون عاوزه فلوس مثلاً هو مش إنتِ شغاله في بنك وموظفة قد الدنيا..
-لا يانيفين هي مشكلتها مش مادية بالعكس دي بتقول إن حالتها المادية كويسه جداً وجوزها كمان بيشتغل كويس ..
-عموماً براحتك..
-طيب ممكن أخد الكتب بتاعتك هاقراها..
-اتفضلي بس انجزي لأني بذاكر أما أشوف أخرتها معاكي إيه..
بدأت البحث عن هذه الحالة وما أسبابها وهل هي تتعمد مثل هذه الأفعال ؟ أم هي أشياء خارجة عن إرادتها ؟؟