بياعة
محمد ربيع محمد | مصر
ع الناصيه قصاد نبض الشارع
بياعة شوق فارشة السكة
والخفة بتطرحها جناين
تفاح الروح اللي مفتح
والعسل السايل ف حروفها
تغريدة بترمي على رسايل
لو رحت بسهدي اشتري منها
وغرامي سابقني ومش ساكت
على غفله ها يلمحني عزولي
فيرح يشتري ود أمبارح
ويسيب عربون ساري لبكره
عناقيد العنب اللي أتدلت
من غير لا غصون ولا تكعيبه
وكريزها اللي بيرفع صوته
على كل الفاكهة المرسومة
ف عيون المارين نواحيها
مع صبر بيتحلى بريقها
يتحدى الشهد واصنافه
حبات الندى فوق العاده
بتذوق حكايات سردتها
بخيوط مبنية على الوقع
اللولي الحر يغير منها
ماهي خمرة جلية بدون كاس
أمشير لو شاف يوم دمعتها
يصرخ بغباره المتحوش …
ف جراب العام
فيحول كفه لمنديل
والرعد لعصفور بيغني
بدلالها النابع من جوه
بتجيب السحر المتعافي
فيبات هزلان
هايمان وف شدة تيارها ….
بتحدى الموج
والعشق مراكب بتسافر
ف جلال البوح
يا بحر عميق ومالوش آخر
وصلني لبر أمان معلوم
غرقان ف الهوى والبال تايه
و مفيش غير شكي اللي صاحبني
لاتبيع الحب بلوم جارح.
