صَوْبَكْ بعتّ القلب.. بالمحكية السورية

ريتا سليمان | سورية

صوبَك بعتّ القلب يوقف عَ باب الدارْ
يلملم ورود الخُطا ويردّها لبابي

===
يرتّل عيوني غزل ويحوّش الأسرارْ
يبوّس طريق المرق من صوبها احبابي

===
يودّي خوابي الضنا تعرّش حكي و اخبارْ
ويجيب حُبّكْ إلي معتَّق مع الخابي

===
رَدّ الأسى لَيي حامل بجرحي نارْ
يشبك كفوف السهر والجفن عنّابي

===
فكّيتْ زرّ الصبر..حلم ال بإيدي طار
من بعد كان الهنا مرهون ع حسابي

===
هادر يا بحر الدمع مع غيبة البحّار
مطيّبْ جْناحه كان ومزهّر وعابي

===
حاسس بموتك صرتْ عم موت ليل نهارْ
وريحة أنين الكفن بتفوح بتيابي

===
مسافر يا بيي و عمر غايب بهالمشوار
تمرجح بإيدك حزن من فوق هالرابي

===
محيّكْ سواد المقل ومطرّز الزنّار
تقلّي ان صفت هالدني بتكون كذّابة