تغريدة
محمد ربيع محمد | مصر
باستحلفك تتوضى من عطر الوطن
وتصلى لله ركعتين
وتصر دايماً ع الدعاء
فيفتح الورد اللي هيمان فى السجود
كما طفل مشتاق للهديه ….
ف صبح عيد
يا خالق الكون اللي عدَّى م البراح
امنحنا طرح الأجوبه
من غير ما يهتك سترنا ….
لوع السؤال
وامنحناعلى كيد العدا ….
حلم ارتوى بماء النضال
واكفينا شر اللي انتوى ….
كسر السليم
واللي اترمى ف حضن التعالب والحيتان
استحلفك بالله تطوّل فى القنوت
وتنمى بذرة قلب طمعان فى الرجاء
من مقلة العين اللي سبحت فى الدموع
أو قلب فيّاض بالحنين
يارب تمحى كل أباليس الظلام
باسم الثكالى .. والأرامل …
واليتامى المحرومين
باسم اللي شيّد فى البناء
باسم اللي زرع الضحكه
فى الأرض العقيم
باسم اللي جاد بالدم …
للفجر الجديد
