أوراق الخريف.. شيزوفرينيا (٦)

شرين خليل | مصر
مرت عدة أيام وأنا لا أعرف عن آلاء أي أخبار وكأنها لم تدخل حياتي وكأني لم أهتم بها..لا أدري لماذا فقدت الشغف في مساعدتها وأصبح لدي فتور شديد وعدم رغبة في التحدث عنها على الرغم من أنني قطعت على نفسي عهداً بأني سأساعدها.. هل ماعرفته عن عائلتها هو ما جعلني على هذه الحالة …
فالإفراط في كل شئ يأتي دوماً بنتائج عكسية:الإفراط في الإهتمام، الإفراط في الحب، الإفراط في الأخذ وحب الإمتلاك.. إنها رغبة الإنسان في تملك الأشياء التي يفتقدها وعدم الرضا بما يملك ..فهو يريد كل شئ..
فوالد آلاء مثال للإنسان الذي يأخذ ولا يُعطي، يتحايل لكي يكتسب تعاطف الآخرين ويرسم الخطة لوالدتها والتي تؤدي دورها بإتقان..وكل هذا في سبيل الحصول على المال والحب والصداقة..شكل من أشكال التسول ولكنه مختلف فهو طمع في الآخرين .. هذا ما جعلني ابتعد عنها… فالإبتعاد أفضل بكثير ..
الآن أدركت لماذا كانت أمي تبتعد عن الناس ولا تتعامل معهم إلا في أضيق الحدود.. ما أفضل الحياة بهذه الطريقة نجعل بيننا وبين من حولنا مسافة آمنة فهي فعلاً آمنة ولانثق في أحد ثقة مطلقة..
فأنا تعلمت مالم أتعلمه من قبل .فهذه التجربة علمتني أشياء مفيدة وأولها القراءة والإهتمام بالكتب .. طرقت أمي باب غرفتي ودخلت :
قعده لوحدك ليه يانور ؟ بقالك كام يوم بتروحي الشغل وترجعي ومابتتكلميش مع حد؟
-بصراحة يا ماما موضوع آلاء ده خلاني مش قادره اتكلم.
-يا بنتي الحياة مليانه حكايات وحكايات ولسه هتشوفي حاجات ودايما خليكي قوية واسمعي وبس، قدرتي تقدمي نصيحة قدمي ما قدرتيش خلاص وخلي دايماً الباب موارب لا تقفليه قوي ولا تفتحيه قوي ..أسرارك احتفظي بها لنفسك عشان كده بأكد عليك اسمعي وما تتكلميش كثير.
-صح يا ماما موضوع آلاء ده أنا عرفت فيه حاجات غريبة ما كنتش أتوقعها..
-آلاء ضحية بس للأسف بعد ما كانت ضحية ما بقتش ضحية لإنها كبرت وفهمت واختارت نفس الطريق اللي هي كانت ماشيه فيه واللي اتعودت عليه هي مش عايزه تتغير وإحنا مش هنقدر نغيرها بس كل اللي نقدر نعمله نقدم لها النصيحة ونسيبها بقى وهي حر..
-يعني ما اسيبهاش يا ماما واتكلم معها وأقدم لها النصيحة وبعد كده اسيبها..
-ايوه يا بنتي هي هتيجي بالليل مامتها كلمتني وقالت لي إن هي هتيجي هي وآلاء تقعد معنا شويه اتكلمي معها وقولي لها وبعد كده سيبيها هي حرة اسمعي منها بس ما تصدقيش كل حاجة وما تضعفيش وبلاش تتعاطفي معاها.. اسمعي بعين العقل وردي عليها بعين العقل .. وبعد كده سيبيها هي مش صغيرة وتقفلي الباب وتبعدي عنها…
-حاضر ياماما..
خرجت أمي وتركتني أفكر فيما سأقوله لآلاء، فأمي لديها الحق فيما قالته لي فأنا سأستمع إلى آلاء كما قالت أمي بعين العقل…
وجاءت آلاء برفقة والدتها وجلست معها وأنا أستمع إليها وهي تحكي عن مدى معاناتها وما حدث لها في الفترة الماضية وكأني أستمع إلى قصة في الإذاعة مسلسل فأنا أشعر أنها تجيد التمثيل . تتحدث وأنا أستمع وأمي تشاهد الموقف وهي أيضاً صامتة والآن جاء دوري لكي أتحدث أنا وأقول كل ما تمنيت قوله: في البداية أحب أقول لك يا آلاء إنك مسؤولة عن اللي أنتِ فيه دلوقت وطبعاً والدتك اللي قاعده جنبك ووالدك هم اللي شجعوكي على كده لأن من صغرك هم بيعملوا الغلط قدامك شيء طبيعي هتشوفي إن الغلط أمر عادي لكن لما كبرتي وفهمتي ليه ماحاولتيش تصححي الغلط وتعيشي حياة صح عشان أولادك ما يعملوش الغلط.. نفسي أسأل مامتك اللي قاعدة جنبك ولا باباك اللي في البيت اللي راسم لكم الخطة عشان تكسبوا تعاطف الناس عشان الناس تساعدكم بأي طريقه وبأي وسيلة عاوزه اسألكم استفدتوا إيه؟ حققتوا إيه؟؟ بيتهيألي النتيجة صفر بل أقل من الصفر..
لو كنتوا مشيتوا صح بدون خداع للناس كان زمان وضعكم أفضل يا ريت تلحقي نفسك أنا عرفت كل حاجه عندك حتى موضوع الإدمان عرفته .. أنا فعلا مصدومة فيك كنت فاكراكي في البداية مريضة وقعدت اقرا عن الشيزوفرينيا واشتري كتب وفي الآخر طلعت الشيزوفرينيا بريئة من تصرفاتك ..بس تعرفي أنا اتعلمت وأخذت درس ودرس عظيم تعلمت كثير جداً منه فهمت حاجات كثير قوي ما كنتش فاهماها وفي فترة صغيرة اتعلمت اللي ما تعلمتوش في عمري اللي فات كله.. عشان كده باشكرك وبقولك حاولي تبدأي من جديد ويا ريت والدتك تلحق نفسها قبل ما العمر بيعدي مالوش داعي التمثيل مالوش داعي الكذب. الحياة مش مستاهلة مننا كل ده.. الحياة أبسط بكتير والدنيا قصيرة والعمر بيعدي وفي النهاية هانحس إنه عدى في لحظة. فخلينا نعيشها بصدق خلينا لما نمشي ونسيب الدنيا نسيب فيها أثر جميل،اللي بعدنا يقول عننا كنا بنحب بجد كنا بنتكلم بجد ما كناش بنخدع حد يقولوا عننا كنا صادقين ودي كفاية ..
حاولي تنقذي نفسك من اللي أنتِ فيه..
نظرت إليّ وقالت : صح إنتِ معاكِ حق بس غصب عني..أنا نفسي أكون زيك، نفسي ابقى حد كويس بس مش عارفه وهربت من مشاكلي بالإدمان بس فوقت لنفسي متأخر..ثم بكت بكاء شديد تذكرت… الحلم الذي رأيتها تبكي فيه..
الغريب أن والدتها لم تنطق ولم تتأثر ..
نظرت لها وأنا مندهشة فآلاء تبكي بشدة ووالدتها لم تواسيها بكلمة واحدة..
شعرت وقتها بأنني مهما تحدثت معها ومهما قلت لها فهي لن تتغير ولكن آلاء تريد التغيير ..
اقتربت منها وخاطبتها برفق: آلاء ماتزعليش مني، أنا خايفة عليكي..
ردت بصوت حزين: أنا مش زعلانه منك أنا زعلانه من نفسي .أنا هامشي وأوعدك إني أحاول أتغير للأحسن..
خرجت آلاء مع والدتها في صمت تام ..
أما أنا فشعرت بإرتياح شديد ودخلت حجرتي وأخيراً ارتاح عقلي من التفكير في حالة آلاء ..
وفي اليوم التالي وبعد رجوعي من العمل وجدت نيفين تنتظرني على شغف :
نورهان اتأخرتي ليه؟
-خير يانيفين إنت واقفه لي على الباب كده ليه..
-عاوزه أقولك خدي يومين أجازة عشان نطلع رحلة لإن بابا مش هيوافق إني اطلع لوحدي ..
– مقدرش يانيفين أخد أجازات دلوقتي خالص..
-يعني الرحلة كده طارت..
-معلش متعوضة..
-بس قوليلي إتأخرتي كده ليه وايه اللي معاكي دا..
– دي كتب وإتأخرت عشان كنت بشتريها..
-كتب!!!!؟؟كتب عن أيه؟
-كتب عن الوسواس القهري والفوبيا..
-نعم؟؟!!
-زي ماسمعتي..
– ليه؟؟ وسواس قهري!!! وفوبيا كمان!!
-هاقولك أصل نجوان صاحبتي عندها وسواس قهري كل شوية تغسل ايدها ومش بس كده دي كمان…
-بس كفاية يانور هو لسه في كمان ارحميني.. وبعدين إنت مالك عندها وسواس ولا معندهاش..
-أنا قولت اقرأ عنه وأساعدها..
– وايه موضوع الفوبيا دا كمان؟؟
– دي هبه ياستي عندها فوبيا من الأسانسير ولحد دلوقتي مش عارفه تشتري شقة هي وخطيبها عشان يتجوزوا فيها بسبب خوفها من الأسانسير .
-لا كده كتير يانور ياحبيبتي..حرام عليكي إنت ماحرمتيش..هاتعيدي موضوع آلاء والشيزوفرينيا تاني..
-عارفه يانيفين أنا نفسي الناس كلها تعرف حقيقة الشيزوفرينيا وأنه مرض مش سهل ولازم نساعد المريض بالشيزوفرينيا..
أنا نفسي نفهم طبيعة الأمراض النفسية وخطورتها وتأثيرها على حياة الإنسان..
-أنا معاكي نفهم ونقرا لكن مانقولش دا عنده ودا عنده كده إحنا اللي هانتعب نفسياً، نور ياحبيبتي في ناس متخصصة في كده..
ارحمينا بقى..أنا داخله أحضر الغدا مع ماما وإنت خليكي مع الشيزوفرينيا…
تركتني نيفين وذهبت..جلست مع نفسي فأنا اشتاقت لنفسي فهي التي تسمعني وتتحمل ما أقوله لها وقسوتي عليها فأنا أعلم جيداً أن كل إنسان لديه أكثر من شخصية بداخله ولكنه يحاول دوماً أن يظهر بأفضل شخصية ..
فنحن جميعاً نعيش في صراع بين مانُريده ومايمكن تحقيقه..
نسعى للأفضل.. فهناك من يسلك طريق مستقيم وهناك من يسلك طريق الغاية تبرر الوسيلة وفي النهاية لايصح إلا الصحيح فمن كان واضحاً وصادقاً سينجو وسيصل إلى بر الأمان أما القناع الزائف سيقع ويسقط مثل أوراق الخريف….