شعر: أحمد عبد الموجود الشيخ
أخدت ع المشي وحدك
حافي ع الأسفلت الفاير
شايل في إيدك غنوتين لمنير
شايل في صدرك أزمة من لسعة يناير
وآمنت إن البشر فترات
وإن السنين ألوان
الشمس يوميا خلف القمر بتبات
العمر خاتم يحبس الأبدان
الأصل في الإنسان الوحدة ماتجزعشي..
عينك نشفت من كتر ما هي مابتنشفش
لملم خيوط النور النازلة من عينك
خلّي السهام في جبهتك تتشفش
عملت ليه من هدمتك مطرح
بتخبي سُكانُه ف جيوبَك
بتحط حواديتهم أساور..
وتلم بعيونهم زراير
تنفلت تِفْتِش عيوبَك
بتشد على القلب النحيف
وتمد دراعيك للسما
وتمر بين الناس خفيف
وتمر بين الكلام همهمه
لو كان سابوك.. خلّي الحيطان أمك
وإعمل من الشارع أبوك
حًط حكاويك في الغناوي
رُش أمانيك ع القهاوي
وأما الكلمة تصادف روحهم
هيرجعوا يغنّوك
